---

ახლა საღამო და ბათუმია,
ნისლი წყნარ ქუჩებზე გაწოლილი;
სახლში სათამაშო დათუნია,
გარეთ ვერანდები დათოვლილი...

ვზივართ მე და შორე, გელოდებით,
ვიცით რომ თვეები მალე გავა,
ახლა ყველა შენში ვმეორდებით,
ყველა შენზე ფიქრმა დაგვაკავა!..

და დღეს ველოდებით, სანატრელი
დილის გათენებას ბეღურებით,
ყველა ტკივილები წავა ძველი,
მოხვალ, თან ყველას გაგვეხუმრები;

ჩვენ კი ჩაგეკვრებით გულში მაგრად,
რომ ღირსეულ შვილად გამოგზარდოთ,
ზეცამ თავზე დილა დაიმაგრა,
ახლა ხვალე უნდა გამოვქარგოთ!